ស្ថិតក្នុងចំណោមបងប្អូន៥នាក់ស្ថិតក្នុងគ្រួសារកសិករ ឌីជេ សាន់ ដែលជាកូនប្រុសច្បង មានតួនាទីរ៉ាប់រងធំក្នុងការចិញ្ចឹមគ្រួសារ ក្រោយអ្នកម្ដាយបានបាត់បង់ជីវិតតាំងពីខ្លួននៅកុមារភាព ខណៈឪពុកក៏ពិការ។ ប៉ុន្តែជំនះការលំបាកនានា យុវជនរូបនេះ បានក្លាយជាពិធីករវិទ្យុល្បីឈ្មោះមួយរូប។
ទម្រាំបានក្លាយជាឌីជេដែលមានការទទួលស្គាល់ដូចសព្វថ្ងៃនេះ ឌីជេ សាន់ ក៏ធ្លាប់បានពើបប្រទះនូវការលំបាកជាច្រើននៅក្នុងខ្សែជីវិត។ លោក ប្រាប់ថា លោកធ្លាប់ជាអ្នកដើរទួលនំលក់ ធ្វើស្រែចម្ការបណ្ដុះផ្សិតលក់ ធ្វើជាកម្មករសំណង់ និងទៅព្រៃរនាមរកត្រីជាដើម។
DJz Sun |
វិលមកដំណើរឆ្ពោះមកកាន់អាជីពជាពិធីករវិញ ដំបូងឡើយគឺតាមរយៈការដាក់ពាក្យបន្ទាប់ពីបានស្ដាប់ប៉ុស្តិ៍វិទ្យុមួយដែលត្រូវការជ្រើសរើសបុគ្គលិកផ្នែកពិធីករ ខណៈពេលនោះលោកផ្ទាល់កំពុងតែធ្វើការឯកជនមួយនៅឯខេត្តកំពង់ស្ពឺ។ យ៉ាងណា ដោយសារនិស្ស័យផង គ្រាន់តែឮដំណឹងនេះភ្លាម ឌីជេសាន់ ក៏រួសរាន់មកដាក់ពាក្យប្រលង។
លោកបានប្រាប់ថា ពេលនោះមានមនុស្សជាច្រើនបានដាក់ពាក្យ ខណៈគេត្រូវការតែពីរនាក់ប្រុសមួយស្រីមួយប៉ុណ្ណោះ។ ជាសំណាងរូបលោកបានជាប់ក៏ព្រោះតែគណៈកម្មការសម្លឹងឃើញពីទេពកោសល្យ និងសមត្ថភាពរបស់លោក ទើបធ្វើឲ្យលោកក្លាយជាឌីជេមកដល់សព្វថ្ងៃនេះ។
បើគិតទៅប្រហែលជា៥ឆ្នាំហើយដែល អ្នកស្រុកបាត់ដំបងម្នាក់នេះ បានប្រលូកជាពីធីករនៅប៉ុស្តិ៍វិទ្យុ។ប៉ុន្តែទើបតែមួយរយៈចុងក្រោយនេះដែលរូបលោកមានការកត់សម្គាល់ថាមានប្រិយមិត្តគាំទ្រច្រើន ជាពិសេសពេលចេញធ្វើដំណើរទៅក្រៅមានការស្វាគមន៍ពីសំណាក់ប្រិយមិត្ត។
វិចិត្រ និង ជុំ លីណូ (រូបថត៖ផ្ដល់ដោយ វិចិត្រ ឬឌីជេសាន់) |
“និយាយរួមទៅខ្ញុំបានដឹងខ្លួនឯងថាមានគេស្រលាញ់ចូលចិត្ត និងគាំទ្រច្រើនតាមរយៈ Fans ជាច្រើនបានLike រូបដែលខ្ញុំបានផុសនៅក្នុងបណ្ដាញសង្គមហ្វេសប៊ុកដែលពីមុនមកមានមិនដល់១០០Likes ផង ប៉ុន្តែឥឡូវជាង១០០០likes”។
Djz Sun Sky ជាឈ្មោះនៅក្នុងហ្វ៊េសប៊ុក បន្តថា៖ “ក្នុងកម្មវិធី “DJ Party ”កាលពីថ្ងៃ១២មិនា២០១៥នៅភោជនីយដ្ឋានរហាត់លាបក្រុមហ៊ុន Spy បានឲ្យឌីជេគ្រប់គ្នាថតកាន់ដប Spy ម្នាក់មួយដបដើម្បីបង្ហោះនៅក្នុង page របស់ ក្រុមហ៊ុន Spy ថាតើឌីជេរូបណាទទួលបានការLikesច្រើនជាងគេ។ ពេលនោះ ខ្ញុំបាទទទួលបានការ likes ច្រើនជាងឌីជេផ្សេងៗ។មិនតែប៉ុណ្ណោះក៏មានឌីជេជាច្រើនមានការស្វាគមន៍ និងរាប់អានរូបខ្ញុំបាទផងដែរ ទាំងអ្នកខ្លះខ្ញុំអត់បានស្គាល់សោះ”។
ហឿន វិចិត្រ ជាឈ្មោះពិតរបស់ឌីជេ សាន់ ដែលឈ្មោះ”សាន់”ទើបតែដាក់ពេលចូលប៉ុស្តិ៍ Sky ប៉ុណ្ណោះ។ ដំបូងឡើយឌីជេម្នាក់នេះ បម្រើការនៅវិទ្យុផ្សេងមួយទៀតប៉ុន្តែដោយសារតែមានប៉ុស្តិ៍ថ្មីគឺប៉ុស្តិ៍ Skyស្របពេលអ្នកគ្រប់គ្រងនៅវិទ្យុថ្មីនេះ ក៏ផ្ដល់ឱកាស លោកក៏មកចូលរួមតែម្ដង។
បច្ចុប្បន្ន Dj Sun កំពុងកាន់កម្មវិធី២ពេលថ្ងៃ ក្នុងនោះចាប់ពីម៉ោង២-៤កម្មវិធី “My clever Show” និងពេលយប់ម៉ោង៩-១០កម្មវិធី”Wow Mr.Man”៕
អត្ថបទ៖ ថា ម៉ាលីដា